Agorrosineko harmailak lepo bete dira Bergara eta Seguraren arteko partidan. Sailkapenean lehenengoak izanik, berdinketa edo garaipen bat baino ez zuten behar bergararrek berriz ere Ohorezko mailara igotzeko. Markagailuan 3 eta 1 amaitu da partida, eta Bergarako neskek mailaz igotzea lortu dute; Nahia Etxarri, Maider Jorge eta Lide Albenizek sartutako golekin.
"Erraza izan da, eta kontrolpean izan dugu partida uneoro" aitortu du BKEko presidenteak, Iosu Elorzak. Beste bi partida aurretik dituzten arren, bermatua dute neskek igoera eta taldekideak "oso pozik" daude: "hasiera batean ez genekien taldeak aurrera jarraitzerik izango zuen, hala ere azkenean taldea osatu genuen eta neskek izan duten elkarlanaren erantzunak izan ditu bere fruituak".
