Agur-ekitaldi hunkigarri eta jendetsua egin dute Oñatiko dantza tradizio oparoaren erreferente nagusi izan den Jesus Irizar Txutxin dantza-maisua agurtzeko. Hileta elizkizun berezia egin zioten atzo iluntzean eta San Migel parrokia hainbat belaunalditako pertsonez bete zen.
Hilotza txistularien doinuekin lagunduta eraman zuten haren etxetik parrokiaraino.
Behin parrokia kanpoaldera iritsita, lehenengo autotik lore sorta ugari atera zituzten: herriko eta herritik kanpoko hainbat dantza taldetakoenak, txistularienak, gaiteroenak eta beste hainbat elkartetatik bidalitakoenak, eta, noski, haren familiartekoenak eta lagunenak ere bai.
Horren ostean, hilkutxa autotik atera eta Corpusetako kofradiako lagunek egin zituzten andero lanak hilkutxa parrokia barrura sartzeko.
Han, aldarearen eskaileren behealdean, alde batean jarri ziren Oñatz dantza taldeko dantzariak eta txistulariak eta beste aldean izan ziren aldarean ez zeuden kofradeak.
Hileta elizkizuneko momentu hunkigarriena iritsi zen Oñatz dantza taldeko bederatzi dantzarik Oñatiko banakua dantzatu zutenean hilotzaren inguruan; Corpus jaietan egiten dutena. Isiltasuna zen nagusi momentu hartan parrokian, txistularien doinuak eta kriskitinak besterik ez zen entzuten, eta emozioz beteriko unea izan zen.
Horren ostean, San Sebastian zortzikoaren doinuek eta kriskitin hotsek lagunduta, hilotza parrokiatik atera zuten kofradeek, familiartekoak atzean zirela, eta parrokia kanpoaldean Agur jaunak kantua jo zuten txistulariek, Jesus Irizar Txutxin-i merezitako azken agurra emateko.
